agl.is - fréttir af austurlandi - Vatnsréttindi: Hefðu önnur orkufyrirtæki ekki þorað í jafn umdeilda framkvæmd?

Vatnsréttindi: Hefðu önnur orkufyrirtæki ekki þorað í jafn umdeilda framkvæmd?

Skrifað af Gunnar Gunnarsson
mánudagur, 07 febrúar 2011
Hæpið er að nokkur erlendur virkjunaraðili hefði treyst sér til að nýta vatnsréttindi Kárahnjúkavirkjunar. Ástæðan er mikil inngrip og umdeild í náttúru annars ríkis. Áhætta við framkvæmd virkjunarinnar var meiri en nokkurrar annarrar virkjunar í Íslandssögunni. Þetta er meðal þess sem fram kemur í rökstuðningi Landsvirkjunar fyrir lækkun bóta fyrir vatnsréttindi til vatnsréttarhafa á vatnasvæði Kárahnjúkavirkjunar. Þar segir: „Hin óumflýjanlega umhverfisröskun sem fylgi nýtingu umræddra vatnsréttinda rýri verðgildi þeirra með afgerandi hætti. Draga megi í efa að nokkur erlendur virkjunaraðili hefði treyst sér til að kaupa og nýta þessi réttindi miðað við slík inngrip í náttúru annars lands og það andrúmsloft til athafna sem því hefði hugsanlega fylgt.“ Landsvirkjun bendi einnig á mikla áhættu við erfiða framkvæmd en löng jarðgöng leiða vatn úr miðlunarlónum á hálendinu niður í stöðvarhúsið í Fljótsdal. „Þessi tækni hafi aldrei verið notuð áður hérlendis. Framkvæmdaáhætta við Kárahnjúkavirkjun hafi því verið meiri en flestra eða allra annarra virkjana í landinu.“
Síðast uppfært ( mánudagur, 07 febrúar 2011 )

< Fyrri		Næsti >