agl.is - fréttir af austurlandi - Leiðrétting vegna fréttar um starfslok bæjarstjóra Fljótsdalshéraðs

Leiðrétting vegna fréttar um starfslok bæjarstjóra Fljótsdalshéraðs

Skrifað af Baldur Pálsson og Soffía Lárusdóttir
laugardagur, 26 júní 2010

Vegna fréttar á vefmiðlinum www.agl.is, sem skrifuð er af Sigurði Aðalsteinssyni 23. júní sl. undir fyrirsögninni „Starfslok Eiríks gætu kostað Fljótsdalshérað allt að 15 milljónum“, viljum við undirrituð koma á framfæri eftirfarandi upplýsingum um biðlaun bæjarstjóra:

                Biðlaun
Dagvinna    644.179
Eftirvinna:    334.490
--------------------------
Samtals:     978.669
Launat.gj. 26%    254.454
Samtals:     1.233.123
Önnur kjör:    151.192
Samtals:     1.384.315
-------------------------------
Samtals 6 mán:    8.305.890

Staðreyndin er sú að starfslok fráfarandi bæjarstjóra kosta sveitarfélagið tæplega sjö milljónum króna minna en Sigurður Aðalsteinsson fullyrðir í frétt sinni.

Laun bæjarstjóra áttu að taka hækkunum samkvæmt samningum Launanefndar sveitarfélaga en þau hækkuðu eingöngu einu sinni eða um 3% áramótin 2007/2008. Öðrum launahækkunum afsalaði bæjarstjóri sér. Á síðast ári voru laun bæjarstjóra skert um fimm daga eins og annarra starfsmanna skrifstofunnar. Önnur kjör bæjarstjóra voru til að mæta kostnaði sem annars lagðist á sveitarfélagið, s.s. akstursgreiðslur vegna alls aksturs sem fylgdu starfi hans, m.a. vegna ferða til Reykjavíkur. Akstursgreiðslum heldur hann ekki á biðlaunatímanum.

Starfsmenn sveitarfélagsins taka laun samkvæmt samningum Launanefndar sveitarfélaga en þar sem engir kjarasamningar eru til við bæjarstjóra var við gerð ráðningarsamnings við fráfarandi bæjarstjóra, tekið mið af kjörum bæjarstjóra í sambærilegum sveitarfélögum. Sumar starfstéttir hjá sveitarfélögum eiga rétt á biðlaunum, allt upp í eitt ár.

Í könnun sem Hag- og upplýsingasvið Sambands íslenskra sveitarfélaga gerði á kjörum sveitarstjórnarmanna, framkvæmdastjóra sveitarfélaga og greiðslum til nefndarmanna hjá sveitarfélögum í júní 2010, má finna upplýsingar um kjör framkvæmdastjóra í sveitarfélögum með 2.000-4.999 íbúa. Þar segir:

„Í þessum flokki skiluðu öll sveitarfélög svörum. Svörunin var því 100%. Niðurstöður eru birtar hér að neðan:
Framkvæmdastjórn
Í öllum tilvikum er ráðinn bæjarstjóri í þessum stærðarflokki sveitarfélaga.
Greiðslur fyrir framkvæmdastjórn
Launagreiðslur til bæjarstjóra eru í þremur tilvikum á bilinu 600–799 þúsund kr., í sjö tilvikum 800–999 þúsund kr., í einu tilviki 1.000–1.199 þúsund kr. og í einu tilviki yfir 1.200 þúsund kr. Hlunnindi bæjarstjóra eru í fjórum tilvikum undir 50 þúsund kr. á mánuði, í tveimur tilvikum á bilinu 50–99 þúsund kr. á mánuði, í þremur tilvikum á milli 100 og 149 þúsund kr., og í fjórum tilvikum á bilinu 150–199 þúsund krónur á mánuði.
Greiðslur til forseta bæjarstjórnar eru mjög mismunandi í þessum stærðarflokki. Þær eru í einu tilviki lægri en 50 þúsund kr., í þremur tilvikum á bilinu 75–99 þúsund kr., hjá fjórum sveitarfélögum eru þær 100–149 þúsund kr., í einu tilviki 150–199 þúsund kr. og í tveimur tilvikum á bilinu 200–249 þúsund kr.
Biðlaunaréttur bæjarstjóra
Biðlaunaréttur bæjarstjóra í þessum stærðarflokki er í 12 tilvikum sex mánuðir og í einu tilviki er hann ekki til staðar.“

Nánar upplýsingar má finna á vef Sambands íslenskra sveitarfélaga.

Launakjör bæjarstjóra Fljótsdalshéraðs í dag eru því í fullu samræmi við launakjör bæjarstjóra í sveitarfélögum af sambærilegri stærð.
Á 37. fundi nýkjörinnar bæjarstjórnar þann 12. júní 2006 var undir lið 24. kynntur málefnasamningur þáverandi meirihluta. Jafnframt var kynnt ráðning bæjarstjóra, Eiríks Bj. Björgvinssonar sem samþykkt var með öllum greiddum atkvæðum.

Í kjölfar fréttar Sigurðar Aðalsteinssonar hafa á vef agl.is fallið ummæli sem við undirrituð tökum nærri okkur en verst eru þau fyrir Eirík og fjölskyldu hans. Eiríkur hefur gegnt starfi bæjarstjóra af trúmennsku, dugnaði og samviskusemi í átta ár. Á þessum tíma hefur sveitarfélaginu vaxið mjög fiskur um hrygg og uppbyggingin verið mikil sem hefur krafist ómælds vinnuframlags af hálfu bæjarstjóra. Þá hefur „hrunið“ kallaði enn frekar á krafta hans og ábyrgð. Gríðarlegt álag fylgdi starfi hans svo og allra þeirra sem starfa bæði í stjórnsýslu og við stofnanir sveitarfélagsins. Undirrituð, sem bæði eru að hverfa af vettvangi sveitarstjórnarmála eftir 12 ára setu þar, vilja nota tækifærið og þakka Eiríki og öllu þessu starfsfólki fyrir vel unnin störf og ánægjulegt og árangursríkt samstarf.

Baldur Pálsson, fráfarandi formaður bæjarráðs Fljótsdalshéraðs.
Soffía Lárusdóttir, fráfarandi forseti bæjarstjórnar Fljótsdalshéraðs.

Ummæli lesenda

Álitsgjöf

Sýna 3 af 3 Ummæli

1. 28-06-2010 12:31

Til Sigurlaugar

Sæl Sigulaug,
Ástæðan fyrir því að ég skrifa ekki undir nafni er einmitt sú hjarðhegðun sem hefur verið ríkjandi í þessu samfélagi og mér sýnist ekki ætla að breytast neitt þrátt fyrir hrun. Ég hef á stundum spurt spurninga sem fólki hefur ekki líkað og fengið allskonar skítkast á mig. Ég var einn þeirra sem ekki skildi hvað var í gangi fyrir hrun og úr hvaða gullkistum fólk væri að fá sitt fé og ræddi mínar skoðanir á því manna á milli en það var eins og að reyna að rökræða við fylgjendur öfgatrúarflokka sem vildu ekkert heyra nema eigin skoðanir og gerðu lítið úr þeim sem andmæltu þeim á allan hátt. Ég passa mig á því að kalla engan nöfnum né gera lítið úr viðkomandi persónu en mannana gjörðir hlýtur að mega disskútera. Mér finnst t.d ummæli sumra á þann hátt að fyrrverandi bæjarstjóri hafi sýnt mikla fórnfýsi býsna hlægileg... hver myndi ekki "fórna sér" fyrir svona launakjör. Við það bætist t.d aðstoðarmaður bæjarstjóra eða verkefnastjóri eins og hann er kallaður í dag og þá er kostnaðurinn orðinn tölverður. En taktu líka eftir því Sigurlaug að engin þeirra sem tekur upp hanskann fyrir þennan samning segja eitt einasta orð um skuldastöðu bæjarins og láta sem allt sé í himnalagi. Ég vona innilega að Gunnari og Stefáni Boga takist vel til í þeirra störfum og hef trú á þeim en verkefnið er ekki auðvelt. Stóri feilinn að mínu mati er sá að fyrrverandi meirihluti sinnti í engu því aðalvandamáli sem hér er núna sem er hnignun atvinnulífsins hér. Atvinnumálum hefði þurft að sinna mikið betur en gert hefur verið því án öflugs atvinnulífs verður aldrei öflugt sveitarfélag. En síðan er mín persónulega skoðun sú að sameina þurfi Austurland í eitt sveitarfélag sem allra fyrst en það er önnur umræða.

dýri

2. 28-06-2010 11:36

Til dýra.

Dýri spyr sömu spurninga og ég gerði forðum í Austurglugganum en fátt varð um svör, þau svör sem bárust þó voru algerlega ófullnægjandi eða hreinlega röng eða snúið út úr eða viljandi misskilin. Verkbókhaldi sveitarfélagsins er í besta falli barnalegt og því mjög erfitt að sjá raunkostnað á hverju verki fyrir sig. Að skrá vinnu við verk í exelskjal sem hægt er að breyta og sveigja að vild eftir á getur varla talist eðlilegt og bíður upp á mistök.

Gaman að fleiri eru farnir að spyrja spurninga þó ég viðurkenni að betra væri að gera það undir nafni, en ég skil þó vel þá sem það gera ekki, rógurinn og skítkastið sem fylgir því ef fólk tjáir sig undir nefni er oft óbærilegur.

Sigurlaug Gísladóttir

3. 28-06-2010 01:23

Merkileg staðhæfing

Í þessum skrifum Soffíu og Baldurs er mjög athyglivert að lesa eftirfarandi " Á þessum tíma hefur sveitarfélaginu vaxið mjög fiskur um hrygg og uppbyggingin verið mikil". Ef ársreikningar sveitarfélagsins eru skoðaðir þá voru heildarskuldir um 2 miljarðar árið 2005 en eru 6,6 miljarðar skv síðasta reikningi. Er það að "vaxa fiskur um hrygg" að mati Baldurs og Soffíu? Verð að viðurkenna að þessa fullyrðingu skil ég ekki og helst á þeim að skilja að þetta sé barasta allt í besta lagi. Hvenær ætlaði þessi síðasti meirihluti að borga skuldirnar? Það er margt sem maður veltir fyrir sér varðandi þær ákvarðanir sem voru teknar á síðasta tímabili t.d
1. Hver er afborgun og vaxtakostnaður vegna nýbyggingar við skólann?
2. Hver er heildarkostnaður af miðbæjarskipulaginu þ.e uppkaup,hönnun o.s.frv?
3. Hver er leigukostnaður per ár af skíthreinsivirkjunum sem leigð eru af Bólholti?
4. Hvernig hefur rekstrarkostnaður yfirstjórnar breyst síðan t.d 2005?
5. Hver er heildarkostnaður af nýju sorpfyrirkomulagi miðað við eldra fyrirkomulag?

Það besta sem gerst getur hér er að þeir sem tóku við stjórnartaumunum hér passi sig á því að hafa opna fundi mánaðarlega til þess að upplýsa fólk og skiptast á skoðunum við íbúa. Kannski erum við sem erum ekki sátt við margt í þessu annars góða sveitarfélagi ekki betur gefnari en svo að við sjáum ekki að það er allt í himmnalagi en þá er best að vettvangur sé til skoðanaskipta þar sem hægt er að ræða málin í þaula. Þannig hefur það ekki verið og mér sýnist sumir þeirra sem hér áður stýrðu á hröðum flótta undan fortíðinni. Heildartap bæjarins var á 500 hundruð miljón á síðasta ári og það þolir sveitarfélagið ekki, þess vegna er fólk hrætt um stöðuna og finnst lítið að gert til þess að útskýra málin. Einnig finnst mörgum sem stjórunum hafi fjölgað mikið og yfirbyggingin sé stór og alltof dýr, en þá tala sumir niður til þeirra sem þetta segja án þess að ræða fjárhagsstöðuna en hún er stóri bleiki fílinn í stofunni sem engin vil ræða um.

dýri

Sýna 3 af 3 Ummæli

Skrifaðu ummæli...

< Fyrri		Næsti >

[ Til baka ]